İtləri “insana” çevirən adam - VİDEO
08.07.2019
İtləri uşaqlıqdan sevən Sergey Baladayev düz 41 ildir ki, kinoloq kimi çalışır. Deyir 1978-ci ildə valideynləri ona it hədiyyə edib.
"Dövran Media" ARB TV-yə istinadən xəbər verir ki, məhz bundan sonra Sergey itləri daha yaxından tanımağa və kinoloqluq peşəsinə maraq göstərməyə başlayıb.
Sergey Baladayev - Kinoloq: "Hazırda Doberman cinsindən olan itə təlim keçirəm. "Haski" və "Samayed" cinsindən olan itlərə isə sahibinə və ətrafa davranış qaydalarını öyrədirəm. Adətən itlər 6 aylıqdan, yəni dişlərini dəyişdikləri dövrdən təlim və tərbiyəyə cəlb edilir. İlk təlimlərdə onlara otur, dur, gəl, yerində dur komandaları öyrədilir".
Sergey təlimə meyilli itlərdən də danışır. Deyir ki, aktiv itlər komandaları daha tez öyrənir. Öyrədilən isə təkcə itlər olmur. Sahibləri də 7-10 gün ərzində düzgün komanda verməyi, itə uyğunlaşmağı və onunla davranmağı öyrənir.
İtlərə qulluq üçün tələb olunan gündəlik xərclərə gəlincə, qəhrəmanımız deyir ki, bu, sahibin özündən asılıdır.
Sergey Baladayev - Kinoloq: "İş adamları vaxtları olmadığından itlərinə hazır yeməklər verir. İti ilə məşğul olmağa bol vaxtı olanlar isə onlara ev yeməkləri - qreçka, düyü verir. Yəni gündəlik xərclər alınan ərazaqlardan asılıdır. Əgər hazır yeməklər alırsansa, onun kisəsi 150-160 manat arasında dəyişir".
Kinoloq itlə əylənməkdən çox, evinin təhlükəsizliyinə üstünlük verən ailələrə ovçarkaları məsləhət görür. Sahibləndikləri itlərin uşaqlarına zərər yetirməsindən qorxan valideynlər isə mühafizə funksiyası olmayan ev itləri ala bilər.
Hazırda özünün ümumi və mühafizə kursu keçmiş Xonda adlı, 4 yaş yarımlıq iti olan Sergey deyir ki, bu heyvanlar sahiblərini heç nəyə dəyişməyəcək qədər sadiqdi. Həm də deyir ki, düzgün rəftar etməsən, hətta ən kiçik və qorxaq it belə sahibini dişləyə bilər. Qısası, hər şey davranışa bağlıdır.
