Müdafiə naziri hərbçiləri təbrik etdi
04.06.2019
Müdafiə naziri Zakir Həsənov Ramazan bayramı münasibətilə Azərbaycan Ordusunun şəxsi heyətini təbrik edib.
Müdafiə Nazirliyindən verilən məlumata görə, təbrikdə deyilir: "Cənab zabitlər, yoldaş gizirlər, miçmanlar, kursantlar, çavuşlar, əsgərlər, matroslar və mülki əməkdaşlar!
Sizi Ramazan bayramı münasibətilə təbrik edir, şərəfli xidmətinizdə hər birinizə uğurlar arzulayıram.
Mərhəmət, şəfqət, xeyirxahlıq, humanizm hissləri aşılayan Ramazan ayını xalqımız həmişə böyük sevgilə yaşayır. Ulu öndər Heydər Əliyevin milli-mənəvi dəyərlərimizin qorunub saxlanması istiqamətində atdığı addımlar sayəsində əmin-amanlığın, qardaşlığın, həmrəyliyin təntənəsi olan müqəddəs Ramazan bayramını ölkəmizdə artıq uzun illərdir dövlət səviyyəsində də qeyd olunur.
Möhtərəm Prezidentimiz, Silahlı Qüvvələrin Ali Baş Komandanı cənab İlham Əliyevin davam etdirdiyi uğurlu siyasət və qətiyyətli islahatlar nəticəsində dövlətimiz daha da güclənib, iqtisadiyyatın dinamik inkişafı təmin edilməklə respublikamız regionda lider olmaqla dünya dövlətləri sırasında öz layiqli yerini tutmuşdur.
Müasir Azərbaycanın iqtisadi gücü qüdrətli ordu quruculuğunun da uğurla davam etdirilməsinə etibarlı zəmin yaradıb. Ordumuz ən müasir silahlarla təmin edilib, şəxsi heyətin döyüş əzmi yüksəlib, mənəvi-psixoloji təminatı daha da gücləndirilib, sosial məişət şəraitin yaxşılaşdırılması məqsədilə böyük addımlar atılıb.
Bu gün peşəkarlığını, döyüş qabiliyyətini daim artıran Ordumuzun şəxsi heyəti inamla xidmətini davam etdirir və Ali Baş Komandanın bütün əmr, göstərişlərini məsuliyyətlə yerinə yetirməyə qadirdir.
Müqəddəs Ramazan bayramı münasibətilə respublikamızın müstəqilliyi və ərazi bütövlüyü uğrunda şəhid olanların xatirəsini ehtiramla yad edir, şəhid ailələrini, Vətən uğrunda sağlamlığını itirən döyüşçülərimizi və veteranlarımızı təbrik edir, onlara ən xoş arzularımı çatdırıram.
İnanıram ki, Azərbaycan Respublikasının Konstitusiyasına, Hərbi Anda və Nizamnamələrə sadiq qalacaq, Vətənə, xalqa, dövlətə sədaqətlə xidmət edəcək, torpaqlarımızın işğaldan azad edilməsinə hər an hazır olacaqsınız.
Bir daha hər birinizi təbrik edir, sizə möhkəm cansağlığı, uzun ömür, ailə səadəti və hərbi xidmətinizdə yeni uğurlar arzulayıram.
Bayramınız mübarək olsun!"
