“Rusiyaya nota verilməlidir” - Millət Vəkili Fuadın müdafiəsinə qalxdı
21.05.2019
"Bir adam hamının xoşuna gəlməyə bilər. Ancaq ən pis şey unutqanlıqdır. Fuad Abbasovun Rusiya-Türkiyə münasibətlərinin ən kritik anlarında göstərdiyi fədakarlıq, Azərbaycanlı-Çeçen konflikti zamanı atdığı addımlar barış üçün olduqca zəruri idi".
Bu sözləri millət vəkili Fazil Mustafa Rusiyada fəaliyyət göstərən, bu günlərdə polis tərəfindən saxlanılan və işgəncəyə məruz qalan jurnalist Fuad Abbasovla bağlı danışarkən deyib.
Millət vəkili deyib ki, dağınız diasporumuzun olduğu, azərbaycanlıların aktiv siyasi fəaliyyət göstərməsinin arzuolunmadığı Rusiya kimi bir dövlətdə Fuad Abbasovun elədiklərini yalnız alqışlamaq lazım idi:
"Rusiyada onsuz da dünyagörüşcə və fəaliyyət sferasına görə olduqca dağınıq bir diasporamızun mövcuddur. Burada hamının maraqlarını təmin etmək elə də asan məsələ deyil. Digər tərəfdən Rusiya Xüsusi Xidmət orqanları üçün azərbaycanlıların aktiv siyasi və mədəni çalışmaları da bir o qədər arzuolunan deyil və belə bir mühitdə kimsə irəli duraraq gücü çatan hansısa işləri görübsə, buna ancaq minnətdarlıqla yanaşmaq lazımdır”.
"Fuadın həbsinə haqq qazandıranlar ayın iş görürlər”
Jurnalistin işgənəyə əruz qalmasının yolverilməz olduğunu qeyd edən F.Mustafa, bəzi azərbaycanlıların bu həbsə haqq qazandırmaq cəhdinə təəssüfləndiyini bildirib:
"Burada Fuad Abbasovun atdığı hansı addımlarda siyasi yanlışlıq, naşılıq və başqa epizodlar da ola bilər. Lakin bu kimsəyə əsas vermir ki, ona fiziki işgəncə versin, üstəlik də başqa birisi də bu işgəncəyə və ya onun saxlanmasına haqq qazandırsın.
Bu haqq qazandıranlar azərbaycanlı olanda, sadəcə ayıb bir davranış kimi qiymətləndirilməlidir. Azərbaycan Xarici İşlər Nazirliyi konkret bu fakta görə Rusiya Xarici İşlər Nazirliyinə nota verməlidir. Bu hadisə digər azərbaycanlıların gözünü qırmaq üçün də düşünələ bilər.
Ona görə də indilik bütün ittihamları yığışdırıb Fuadın hüquqlarının müdafiəsi istiqamətində həm peşəkar hüquqi, həm də siyasi addımlar atılmalıdır. Bütün hallarda Azərbaycan dövləti öz vətəndaşının arxasında durmalıdır və Rusiyadakı səfirimiz oranın hüquq-mühafizə orqanlarının rəhbərləri ilə müzakirələr apararaq bu biabırçı davranışı törədənlərin məsuliyyətə cəlb olunması istiqamətində fəal diplomatik addımlar atmalıdır”.
