Türk qırıcıları Ermənistanı SİRKƏLƏDİ
25.02.2019
Ermənilər Türkiyə ordusunun Qarsda keçirdiyi hərbi təlimlərdən qorxuya düşüblər. Erməni hərbi analitik David Arutyunov bu təlimləri Yerevana qarşı təzyiq vasitəsi adlandırıb.
Türkiyə Silahlı Qüvvələrinin Qars vilayətində təşkil etdiyi və Azərbaycan, Bosniya və Herseqovina, Qətər, Böyük Britaniya, Almaniya, İtaliyadan 251 hərbçinin iştirak etdiyi "Qış-2019” irimiqyaslı hərbi təlimlərinin uğurla başa çatması ermənilərin təşvişinə səbəb olub. Bu qorxunu açıqca büruzə verən Arutyunov bildirib ki, həmin tədbirin siyasi məqsədi və geosiyasi hədəfləri var. Onun sözlərinə görə, guya Ankara Suriyaya humanitar yardım göndərən Yerevana təzyiq göstərmək istəyir. Analitik ənənəvi erməni hiyləgərliyi ilə əlavə edib ki, Türkiyə Suriyada mövqeyini möhkəmlətmək üçün, habelə Cənubi Qafqazda təsirini artırmaq məqsədilə Rusiyaya da təzyiq göstərir. Ən gülünc olanı isə, onun müzəffər Azərbaycan ordusunun uğurlu 2016-cı il Aprel əməliyyatını da bu fonda təqdim etməsidir. Arutyunyan Türkiyənin bu siyasətinin Dağlıq Qarabağ münaqişəsinə və Ermənistana da təsiri olacağını bildirib.
