Lift düyməsini qıran hakimlə bağlı RƏSMİ AÇIQLAMA - YENİLƏNİB + FOTO/VİDEO
12.06.2023
Bu gün bəzi media orqanlarında və sosial şəbəkələrdə Binəqədi Rayon Məhkəməsinin hakimi Zamiq Bağırovun barəsində şəxsi zəmində baş vermiş məişət hadisəsi ilə bağlı məlumatlar yayılıb.
Bu barədə Binəqədi Rayon Məhkəməsindən bildirilib.
Yayılan məlumatlarla əlaqədar qeyd olunub ki, aidiyyəti üzrə müvafiq araşdırmalar aparıldıqdan sonra nəticəsi barədə ictimaiyyətə əlavə məlumat veriləcək.
15:30
Binəqədi Rayon Məhkəməsinin hakimi Zamiq Bağırovun "Yeni Həyat” yaşayış kompleksində liftin idarəetmə lövhəsindəki hissəni qırmasının təfərrüatı üzə çıxıb.
Z.Bağırovun yaxınları "Qafqazinfo”ya bildirib ki, o, 15 günə yaxındır ki, səhhəti ilə əlaqədar bülletendədir və hadisə onun işdə olmadığı müddətdə baş verib.
Bildirilib ki, Z.Bağırovun yaşadığı yaşayış kompleksinin liftinin fəaliyyəti komendantlığın qərarı ilə bir müddət əvvəl dayandırılıb. Bir qrup sakinin təyin olunmuş kommunal ödənişləri etməməsi səbəbindən bina rəhbərliyi təzyiq vasitəsi kimi lifti söndürüb. Buna etiraz olaraq kommunal ödənişi edən sakinlər Xətai Rayon Məhkəməsinə müraciət ediblər. Məhkəmə liftin fəaliyyətinin kommunal borca görə dayandırılmaması ilə bağlı qətnamə çıxarıb. Bundan sonra Z.Bağırov, eləcə də digər sakinlər məhkəmə sənədini komendantlığa təqdim etsələr də, liftin fəaliyyəti bərpa edilməyib. Nəhayət, Z.Bağırov əsəbi şəkildə liftə daxil olaraq idarəetmə panelinə ziyan vurub.
Vəkil Hikmət Əliyev bildirib ki, ümumiyyətlə, həmin binaya girişlə bağlı qanunsuz müdaxilələrə görə, başqa şikayətlər də var. Hazırda həmin şikayətlər üzrə də məhkəmə çəkişmələri davam edir.
13:22
Bakıda yaşayış komplekslərindən birində binanın liftinin düymələri qoparılıb.
Bu barədə məlumatı sosial şəbəkələrdə Haqqın.az xəbər portalının baş redaktoru Eynulla Fətullayev paylaşıb.
O qeyd edib ki, hadisə şəhərin mərkəzində, "Yeni Həyat” yaşayış kompleksində qeydə alınıb.
"Rüsvayçı hadisəni Binəqədi Rayon Məhkəməsinin hakimi Zamiq Rəşid oğlu Bağırov törədib. O, sakinlərin liftini qırıb. Buna nə ad verəsən? Bu nə vəhşilikdir? Dövlət, Milli Məclis, Məhkəmə-Hüquq Şurası dərhal bu hadisəyə reaksiya verməlidir. Bu psixi xəstəyə insan talelərini necə etibar etmək olar?”, - deyə jurnalist paylaşımında qeyd edib.
