ASELSAN yollarda sıxlığı aradan qaldırmaq üçün yeni layihə hazırlayıb
12.05.2023
ASELSAN Azərbaycan Avtomobil Yolları Dövlət Agentliyinin (AAYDA) tələbi çərçivəsində magistral yollarda nəqliyyat vasitələrinin ölçü və çəki pozuntularını aşkar etmək üçün yeni layihə hazırlayıb.
8 may 2023-cü il tarixində baş tutan açılış mərasimində ASELSAN İdarə Heyətinin sədri və direktoru prof. dr. Haluk Görgün, ASELSAN direktor müavini və UGES sektor müdiri prof. dr. Mehmet Çelik, ASELSAN - Bakü şirkətinin direktoru Özgür Kürüm, eləcə də Türkiyə Prezident Aparatı Maliyyə İdarəsinin müdiri prof. Dr. Göksel Aşan, Şimali Kipr Türk Respublikasının Bakı nümayəndəsi Səfir Ufuk Turganer, Türkiyənin Azərbaycandakı Səfirliyinin Ticarət Müşavirliyinin baş müşavirləri, Azərbaycan Avtomobil Yolları Dövlət Agentliyinin rəsmiləri və Azərbaycan Rəqəmsal İnkişaf və Nəqliyyat Nazirliyinin rəsmiləri iştirak ediblər.
Mərasimdə çıxış edən ASELSAN İdarə Heyətinin sədri və Direktoru cənab prof. dr. Haluk Görgün bildirib ki, layihə nəqliyyat sıxlığını azaldacaq və səmərəli axını təmin edəcək:
"Komandalarımızın gərgin və fədakar zəhməti sayəsində biz layihəmizi nəzərdə tutulan vaxtdan daha əvvəl Bakı yaxınlığında, Tağıyev qəsəbəsində istifadəyə verdik. Azərbaycanda ümumilikdə müxtəlif məntəqələrdə həyata keçiriləcək və Bakıda bir mərkəzdən canlı izlənilə və idarə oluna bilən bu texnologiyanı qısa müddət ərzində istifadəyə verdiyimiz üçün çox şadıq. Bu layihə ilə avtomobil yollarında nəqliyyat vasitələrinin dayanmasına və ya sürətinin azalmasına ehtiyac qalmadan, çəki ölçülərək nəqliyyat sıxlığı azalacaq və daha səmərəli nəqliyyat axını təmin ediləcək”.
Yüksək dəqiqliklə nəqliyyat vasitələrinin aşkarlanması, təsnifatı və dövlət qeydiyyat nişanının tanınması imkanlarını təmin etməyi və müxtəlif məntəqələrdə quraşdırılmasını hədəfləyən layihə ilə nəqliyyat sıxlığının real vaxt rejimində izlənilə bilməsi, eyni zamanda nəqliyyatın idarə edilməsinə töhfə verərək yol texniki qulluq xərclərinin azaldılması hədəflənir. Daha az operator və avadanlıq tələb etdiyi üçün sərfəli bir həll olaraq təqdim edilən sistemlə həddindən artıq yüklənmiş avtomobillər də aşkarlanaraq bu nəqliyyat vasitələrinin yollara və ya körpülərə zərər verməsinin qarşısı alınacaq. İnsanlara və planetə xidmət edən texnologiyası ilə hər sahədə davamlılıq fəaliyyətlərini sürətləndirən ASELSAN, bu layihə ilə həddindən artıq yüklənmiş avtomobilləri aşkar edərək hava çirkliliyinin və parnik qazı emissiyalarının da azaldılmasını təmin edir.
ASELSAN haqqında: Qlobal texnologiya lideri olan şirkət ixtisaslı insan resurslarına sərmayə qoyaraq, bütün dünyada istifadəçilərinə yeni təcrübələr təqdim etməklə davamlı və ruhlandırıcı şəkildə böyüməyə davam edir. Bir radiostansiya ilə başlayan səyahət bu gün müdafiə və təhlükəsizlik sahəsində 500-dən çox müxtəlif məhsul və həllər əldə etdi. Uzunmüddətli inkişaf strategiyası perspektivli bazarlarda investisiya imkanlarından istifadə etməyə imkan verdi. Şirkət hər yeni gün 80-dən çox ölkədə istifadəçilər tərəfindən dəstəklənən texnologiyanın hüdudlarına meydan oxumağa təşviq edən yeni ideyalar və xəyallarla başlayır. ASELSAN sonsuz motivasiya ilə daha yaxşı bir planet üçün səy göstərməyə davam edəcək.
