Xudafərin-Qubadlı-Laçın avtomobil yolunun 40 %-dən çoxu hazırdır
11.04.2023
Azərbaycan Avtomobil Yolları Dövlət Agentliyi Xudafərin-Qubadlı-Laçın avtomobil yolunun tikintisi işlərinin 40 %-dən çoxunu icra edib.
"DM” xəbər verir ki, bu barədə Agentliyin, qurumun sədri Saleh Məmmədovun Kəlbəcər, Laçın, Qubadlı, Zəngilan və Cəbrayıl rayonlarına səfərinin yekunlarına dair qurumun yaydığı məlumatda bildirilir.
Məlumata görə, səfər çərçivəsində S.Məmmədov ümumi uzunluğu 82 kilometr olan Toğanalı-Kəlbəcər-İstisu avtomobil yolunun tikintisi və yol üzərində inşa olunan dünyanın ən uzun avtomobil tunellərindən biri olacaq Murovdağ tunelinə baxış keçirib.
Bundan başqa sədr 72,3 kilometr uzunluğunda olacaq Kəlbəcər-Laçın avtomobil yolunda aparılan tikinti işləri, Laçın hava limanının tikintisi ilə əlaqədar torpaq işlərinin yerinə yetirilməsi, Laçın şəhərinin daxili yollarının bərpası layihəsi, həmçinin Xudafərin-Qubadlı-Laçın avtomobil yolu layihəsinin icra vəziyyətləri ilə tanış olub.
Hazırda Toğanalı-Kəlbəcər-İstisu avtomobil yolunda torpaq yatağının, süni qurğuların və 4 avtomobil tunelinin tikintisi davam etdirilir, 3 tuneldə qazma, püskürtmə və beton işləri tamamlanıb, Murovdağ tunelində isə qazma işləri davam etdirilir. Artıq tuneldə hər bir istiqamət üzrə 5 kilometrə yaxın qazma, püskürtmə və beton işləri tamamlanıb, 14 ehtiyat keçidinin tikintisi yekunlaşıb. Kəlbəcər-Laçın avtomobil yolu boyunca torpaq yatağının, süni qurğuların və tunellərin tikintisi davam etdirilir.
Eyni zamanda Xudafərin-Qubadlı-Laçın avtomobil yolunun başlanğıcını götürdüyü Horadiz-Cəbrayıl-Zəngilan-Ağbənd avtomobil yolunun (Zəngəzur dəhlizi), həmçinin Şükürbəyli-Cəbrayıl-Hadrut avtomobil yolunun da tikintisi sürətlə davam etdirilir. Yol boyu torpaq yatağının və yol əsasının, asfalt-beton örtüyünün döşənməsinin, boru və keçidlərin, tunel və körpülərin tikintisi gedir.
