Azərbaycan rəsmiləri Türkiyənin Bakıdakı səfirliyində olublar, başsağlığı veriblər - FOTO
09.02.2023
Azərbaycan rəsmiləri Türkiyənin Bakıdakı səfirliyində olublar, zəlzələdə ölənlərə görə başsağlığı veriblər.
Bu barədə diplomatik nümayəndəliyin "Twitter” hesabında paylaşım edilib.
Bildirilib ki, fevralın 9-da Qafqaz Müsəlmanları İdarəsinin sədri şeyxülislam Allahşükür Paşazadə, Azərbaycanın keçmiş Baş naziri, Türk Dövlətləri Ağsaqqallar Şurasının üzvü Həsən Həsənov, Milli Məclisin deputatı Nizami Cəfərov, Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov və Azərbaycan Milli Elmlər Akademiyasının (AMEA) prezidenti, akademik İsa Həbibbəyli səfirliyə gələrək təbii fəlakət nəticəsində çox sayda insanın həlak olması ilə əlaqədar başsağlığı veriblər.
Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Güclü yeraltı təkanlardan sonra bölgədə 6,6 maqnitudayadək yüzlərlə afterşok qeydə alınıb. Təbii fəlakət Türkiyə və Suriyada böyük dağıntı və minlərlə itkiyə səbəb olub.
İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.
Türkiyə Prezidenti Rəcəb Tayyib Ərdoğan ölənlərin xatirəsini anmaq üçün ölkədə 7 günlük matəm elan edib. Bundan başqa, ölkənin zəlzələ baş verən 10 şəhərində 3 aylıq fövqəladə vəziyyət elan olunub.
Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb.
Son məlumata görə, hadisə nəticəsində Türkiyədə 12 873 nəfər ölüb, 62 937 nəfər yaralanıb.
