Ned Prays Azərbaycan-Ermənistan normallaşmasından danışıb
19.01.2023
ABŞ dövlət katibi Entoni Blinkenin Ermənistan lideri ilə danışmaq imkanı oldu. Ümid edirəm ki, onun (Blinkenin) yaxın günlərdə Azərbaycan Prezidenti İlham Əliyevlə danışmaq imkanı olacaq.
"DM" xəbər verir ki, bunu ABŞ Dövlət Departamentinin sözçüsü Ned Prays mətbuat brifinqində deyib.
O bildirib ki, ABŞ tərəflər arasında normallaşma üçün əlindən gələnin ən yaxşısını edir: "Ötən ilin sonunda dövlət katibinin azərbaycanlı və erməni həmkarları ilə bir neçə görüşü oldu, dövlət katibi Blinkenin iştirakı ilə Ermənistan və Azərbaycan arasında görüş keçirildi. Təbii ki, biz son vaxtlar Qarabağla bağlı geriləmə - uğursuzluqlar gördük. Biz konstruktiv dialoqun bərpa olunduğunu görmək istəyirik. Biz əməkdaşlıq etməyə hazırıq”.
Ned Prays qeyd edib ki, ABŞ həm keçmişdə olduğu kimi, ATƏT vasitəsilə və ya lazım gəldikdə, üçtərəfli qaydada tərəfdaşlarla və beynəlxalq tərəfdaşlar vasitəsilə işləməyə hazırdır.
"Biz doğru zamanda ən təsirli olanı təsirli formatda edəcəyik”, Prays vurğulayıb.
Onun sözlərinə görə, Qafqaz danışıqları üzrə xüsusi nümayəndə, səfir Filip Riker 30 illik karyerasından sonra Dövlət Departamentindən təqaüdə çıxsa da, bu prosesdə iştirak edəcək digər şəxslər var: "Dövlət Departamentində bu prosesdə dərindən iştirak edən bir sıra şəxslər var, onlardan ən azı katib Blinkenin özüdür. Bu, onun şəxsi prioritetidir. Amma Viktoriya Nuland, Karen Donfrid kimi, bizim Avropa və Avrasiya məsələləri üzrə Büromuzun bir sıra yüksək vəzifəli məmurları kimi insanlar bununla dərindən məşğul olacaqlar”.
Prays deyib ki, Azərbaycan və Ermənistan arasında görüşlərin hansı səviyyədə keçirilməsinə tərəflər özləri qərar verir.
