Sentyabrın 17-dən hava kəskin dəyişəcək
13.09.2018
Sentyabr ayının 17-dən etibarən Azərbaycanda havanın temperaturu aşağı enməyə başlayacaq.
Ekologiya və Təbii Sərvətlər Nazirliyinin Ekoloji maarifləndirmə və ictimaiyyətlə əlaqələr şöbəsinin müdiri Umayra Tağıyeva Report-a açıqlamasında bildirib ki, hazırda ölkə ərazisində iqlim normasından yuxarı temperatur müşahidə olunur: "Ümumiyyətlə sentyabr ayının ötən dövründə havanın temperaturu iqlim norması daxilində olub, ayrı-ayrı günlərdə normadan 1-2 dərəcə yuxarı qalxıb. Lakin ayın ikinci ongünlüyünün ikinci yarısında, yəni sentyabr ayının 17-dən başlayaraq Abşeron yarımadasında şimal küləyinin sürəti bir qədər artacaq".
Onun sözlərinə görə, sentyabr ayına xarakterik göstəricilərə uyğun olaraq son günlər gündüz müşahidə edilən temperaturla axşam müşahidə olunan arasında fərq var: "Gecə və gündüz arasında olan temperatur fərqi avqust ayı ilə müqayisədə daha çox hiss edilir. Gündüz hava isti olsa da, axşam saatlarında sərinlik qeydə alınır".
Şöbə müdiri həmçinin sentyabr ayında temperatur rejiminin əhali, xüsusən də meteohəssas insanlar üçün əlverişli olduğunu da qeyd edib: "Bu il sentyabar ayının ikinci yarısında meteohəssas insanlar üçün komfort hava şəraiti müşahidə olunacaq. Havanın temperaturu 30-32 dərəcədən yuxarı olmayacaq"
