70 məzun işə götürüldü - BAKIDA
12.09.2018
Azərbaycan Texniki Universitetinin (AzTU) məzunları Müdafiə Sənayesi Nazirliyinin zavod-komplekslərinə təyinat alıblar.
"Dövran Media" xəbər verir ki, Müdafiə Sənayesi Nazirliyini xüsusi ixtisaslı
mühəndis kadrları ilə təmin etmək məqsədilə AzTU-da yaradılan "Xüsusi texnika və texnologiya” fakültəsinin məzunlarının işlə təmin olunması üçün komissiya təşkil edilib. Nazirliyin və AzTU-nun birgə yaratdığı seçim komissiyasının tərkibinə Müdafiə Sənayesi Nazirliyinin nümayəndələri,
nazirliyin tərkibində olan müəssisələrin rəhbərləri və AzTU rəhbərliyi daxildir.
Bu gün AzTU-da gənc silah mütəxəssislərinin işlə təmin olunması məqsədilə komissiya üzvlərinin və məzunların iştirakı ilə 70-ə yaxın məzun arasında yaşadığı ərazi nəzərə alınaraq, ixtisas üzrə bölgü keçirilib.
Təhsildə göstəricisi və ixtisası nəzərə alınaraq komissiya tərəfindən seçilən gənc mühəndislər könüllü olaraq Nazirliyin "İQLİM” Elmi-İstehsalat Müəssisəsi, "Araz" zavodu, Bakı Cihazqayırma Zavodu, "Alov" zavodu, "PEYK" zavodu, Еlmi-Tədqiqаt İnstitutu və digər bu kimi böyük komplekslərinə təyin ediliblər.
Seçim zamanı "Xüsusi texnika və texnologiya” fakültəsinin magistratura səviyyəsinə qəbul olunan tələbələrin təyinatı isə fakültə rəhbərliyinin məsləhəti ilə Nazirliyin Еlmi-Tədqiqаt İnstitutuna verilib. Bu yolla elmi fəaliyyətlərini davam etdirmək niyyətində olanlar üçün də şərait yaradılıb.
Qeyd edək ki, komissiya hərbi xidmətdə olan məzunlarla hərbi xidmətlərini başa vurduqdan sonra əlaqə yaradacaq və onlar müvafiq işlə təmin olunacaqlar.
