3 ölkənin Rusiyaya qarşı 10 maddəlik şok planı
26.03.2022
Polşa Sloveniya və Çexiya ilə birlikdə Ukraynada müharibəni bitirmək üçün AB-nin yerinə yetirməli olduğu 10 maddədən ibarət plan hazırlayıb.
"Devran Media" xəbər verir ki, bu barədə Polşa Baş naziri Mateuş Moravetski "Politiko” nəşrində yayımlanan məqaləsində bildirib.
"Qərb Rusiyaya qarşı 4 sanksiya paketi tətbiq edib, amma müharibə davam edir. Tədbirlər yetərli deyil. Daha böyük və daha sürətli addımlar atmaq lazımdır.
Ona görə də 3 ölkə növbəti addımları təklif edir:
1. Rusiyanın bütün bankları SWİFT-dən çıxarılmalıdır, yoxsa rus iqtisadiyyatı bir neçə həftə ərzində yeni şərtlərə adaptasiya olunacaq;
2. Moskvanın cinayətkar rejimi üçün vuruşmaq istəməyən rus əsgərlərinin yerləşdirilməsi istiqamətində vahid siyasət yeridilməlidir;
3. Rusiyanın Avropadakı təbliğatı tamamilə dayandırılmalıdır;
4. Rus gəmiləri Avropanın bütün limanlarında bloklanmalıdır;
5. Belə bir blokadanı Rusiyadan gələn və Rusiyaya gedən avtomobillər üçün də etmək lazımdır;
6. Sanksiyalar təkcə oliqarxlara deyil, bütün biznes mühitinə tətbiq edilməlidir;
7. Rusiyanın Avropaya getmək istəyən bütün vətəndaşlarına vizanın verilməsi dayandırılmalıdır. Rusiya xalqı anlamalıdır ki, müharibəyə görə nələr alır;
8. Vahid Rusiya Partiyasının bütün üzvlərinə sanksiya tətbiq edilməlidir;
9. Hərbi məqsədlər üçün istifadə oluna biləcək texnologiyaların Rusiyaya ixracına tam qadağa qoyulmalıdır;
10. Rusiya bütün beynəlxalq təşkilatlardan çıxarılmalıdır. Cinayətkarlarla bir masada oturmaq olmaz", - baş nazir qeyd edib.
