Rumıniyada qəzaya uğrayan qırıcını axtaran helikopter yerə çırpıldı
03.03.2022
Rumıniyada qəzaya uğrayan MiQ-21 qırıcısının ardınca onun axtarışlarına yollanan və eyni bölgədə qəzaya uğrayan "IAR-330 Puma” helikopterinin də qalıqları tapılıb.
Bu barədə Rumıniya Müdafiə Nazirliyi məlumat yayıb.
Qeyd olunub ki, MiQ-21 qırıcısı ilə yerli vaxtla 20:03-də rabitə əlaqəsi itib, bundan sonra saat 20:21-də qırıcının axtarışı üçün "IAR-330 Puma” tipli helikopter göndərilib. Saat 20:44-də helikopterlə də əlaqə kəsilib.
Hazırda qırıcının pilotunun axtarışları davam edir. Helikopterdə olan yeddi əsgərin isə həlak olduğu bildirilir.
Qəzanın Ukraynanın Rusiya ordusunun nəzarətinə keçən Zmeynıy adasına 45 kilometr məsafədə baş verdiyi vurğulanır.
Mənbə: Anadolu
