Şəhidin xatirə lövhəsinin ətrafı bərbad vəziyyətdədir

16.09.2021

Abşeronda Vətən müharibəsi şəhidinin xatirəsinə qoyulan lövhənin ətrafı bərbad vəziyyətdədir.

Bu barədə sakinlər tərəfindən məlumat verilib. Söhbət Abşeron rayonu, ipək yolu adlanan ərazinin yaxınlığından (Nübar qəsəbəsi) gedir.

Sakinlər iddia edir ki, Vətən müharibəsi şəhidi baş leytenant Şirəliyev Sahib Yusif oğlunun şəkli vurulan lövhənin yaxınlığındakı natəmizliyə nəzarət edən yoxdur:

"Şəhidin xatirəsinə hörmət edilmir. Başqa yerlərdə şəhid lövhəsi olan küçələrdə aidiyyəti orqanlar tərəfindən abadlıq işləri aparılır. Ən azından ərazidə təmizliyə nəzarət edilir. Lakin burada heç bir təmizlikdən söhbət gedə bilməz. Yolun sağında şəhidin xatirəsinə yerləşdirilən lövhə, solunda isə zibillik var. Zibilləri də təmizləmək yerinə yandırırlar. Yaxşı olardı ki, ərazidə bir qədər abadlıq işləri aparardılar. Küçədə nə asfalt örtüyü var, nə də təmizlik”.

Məsələ ilə bağlı Abşeron Rayon İcra Hakimiyyəti ilə əlaqə saxladıq. Telefonlara cavab verən xanım bizi Hökməli qəsəbəsinin inzibati ərazi dairəsi üzrə nümayəndəliyinə yönləndirsə də, telefonlarımıza cavab verən olmadı.