Lavrovdan Navalnı ilə bağlı cavab
03.02.2021
"Qərb ölkələrinin Aleksey Navalnı ilə əlaqədar başlatdığı isterik münasibətin dərəcəsi, hədləri aşır”.
Bunu Rusiya xarici işlər naziri Sergey Lavrov İordaniya xarici işlər naziri Ayman Hüseyn Abdullah əs-Səfadi ilə danışıqlardan sonra keçirdiyi ortaq mətbuat konfransında deyib.
"Təkcə Navalnı ilə bağlı deyil, Rusiyada baş verən bütün hadisələrə gəldikdə, Qərbdə bunlar xüsusi və birtərəfli şəkildə işıqlandırılır. Navalnının məhkəməsi ilə əlaqəli eşitdiyimiz isteriya hədləri aşır”, - deyə Lavrov bildirib.
XİN rəhbəri qeyd edib ki, Almaniya, Fransa, ABŞ və digər Qərb ölkələrində nümayişçilər avtomobil yoluna girdiyinə və ictimai nəqliyyatın normal işləməsinə mane olduqlarına görə ağır cərimələr və hətta uzun illər həbs cəzaları ilə üzləşirlər.
"Bizdə qanunsuz aksiya keçirənlərə hüquq-mühafizə əməkdaşlarımızın münasibəti ilə müqayisə olunduqda onlarda polis bu kimi hallarda daha sərt davranır”,- deyə nazir vurğulayıb.
Xatırladaq ki, fevralın 2-si Moskvanın Simonovski şəhər məhkəməsi Navalnının "İv Roşe” işi üzrə şərti cəzasını ləğv edərək onu 3,5 illik həbs cəzası ilə əvəz etmişdi. Navalnının həbsi ümumi rejimli cəzaçəkmə müəssisəsində davam edəcək. Onun "İv Roşe” işi üzrə ev dustaqlığında keçirdiyi 1 il nəzərə alınaraq həbsxanada 2,5 il cəza çəkəcək.
