Deputatlar işğaldan azad olunmuş ərazilərə niyə getməyib?
27.11.2020
27 sentyabr-10 noyabr aralığında Şanlı Orduz 30 ildir işğalda olan yüzlərlə kənd, qəsəbə, şəhəri düşməndən azad etdi. Hər kəs o torpaqlara gedəcəyi günün həsrətindədir.
Ağdam şəhərinin deputatı Bəxtiyar Əliyev hələ ki gözləyir:
"Bütün Ağdam ermənilər tərəfindən dağıdılıb, tanınmaz hala salınıb. Ağdama böyük qayıdış olacaq. Bununla bağlı ciddi işlər görülməlidir. Bütün ağdamlılar ora qayıtmaq həsrəti ilə yaşıyırlar. İnşallah, minlar təmizlənəndən sonra oranı gedib ziyarət etmək mümkün olacaq.
Biz ilk növbədə insanlarımızı və onların təhlükəsizliyini düşünərək səbr etməliyik. Ağdam minalardan təmizlənərək, təhlükəsizlik təmin olunandan sonra gedib oranı ziyarət edəcəm”.
Ağdamın kənd ərazisinin deputatı, "Azərbaycan” qəzetinin baş redaktoru Bəxtiyar Sadıqov:
"İnşallah, yollar açılandan, tövsiyyə olunandan sonra təbii ki, gedəcəm. İndiki halda getmək çox təhlükəlidir. Çünki erməni dığaları çıxarkən oranı minalayıblar. Hərbi komendatura ora köçüb, fəaliyyətə başlayandan sonra bizim də ora getməyimiz gerçəkləşəcək”.
Cəbrayıl rayonunun deputatı Ceyhun Məmmədov:
"Mən hələ ki Cəbrayıla şəkillərdən, videolardan baxıram. Cəbrayıl rayonunda təmizləmə işləri getdiyi üçün səfər etmək çətindir. Əlbəttə ki, getməyi planlaşdırıram. Lakin ermənilər çıxdığı vaxt ərazini minaladığı üçün ora getmək təhlükəlidir. Fürsətdən istifadə edərək, xalqa demək istəyirəm ki, səbr etsinlər. Təmizləmə prosesi başa çatandan sonra hər kəsə getmək üçün şərait yaradılacaq”.
