Prezident bu təkliflə niyə 10 gün sonra razılaşdı?
25.11.2020
Rusiya Qarabağa sülhməramlılarını göndərməsi ilə bağlı planını müharibənin ilk günündən hazırlamışdı. Moskva bu planını oktyabrın ilk günlərindən gündəmə gətirirdi. Ancaq bunun üçün həm Ermənistanın, həm də Azərbaycanın razılığı lazım idi - bunu rusiyalı rəsmilər də bir neçə dəfə səsləndirmişdi.
DM xəbər verir ki, bu fikirləri politoloq Elxan Şahinoğlu deyib. O bildirib ki, Azərbaycan və Ermənistan xarici işlər nazirlərinin oktyabrın 10-da Moskvada keçirilən ilk görüşündə bu mövzu geniş müzakirə olundu:
"Müzakirənin təxminən 11 saat davam etməsinin səbəblərindən biri də məhz bu mövzu ilə bağlı idi. Ancaq oktyabrın 10-u üçün Azərbaycan Ordusu hələ ilk qələbələrini qazanmışdı, rusiyalı sülhməramlıların bölgəyə gəlişinə yaşıl işıq yandırmaq Azərbaycan baxımından işin yarımçıq qalmasına səbəb ola bilərdi. Buna görə də rəsmi Bakı sülhməramlıların keçmiş Dağlıq Qarabağda yerləşdirilməsinin hələ erkən olduğunu bildirirdi.
Prezident İlham Əliyev oktyabrın 29-da Rusiyanın "İnterfaks” agentliyinin əməkdaşının sülhməramlılarla bağlı sualına belə cavab vermişdi: "Biz bu bəndə çatmamışıq. Regiona sülhməramlıların göndərilməsi nizamlamanın sonuncu mərhələsində, işğalın nəticələri aradan qaldırılanda, işğal edilmiş ərazilər qaytarılanda, qaçqınlar Dağlıq Qarabağa qayıdanda planlaşdırılırdı. Bəli, erməni və azərbaycanlı əhalinin birgə yaşamasını təmin etmək üçün birinci mərhələdə ayırıcı qüvvələr lazım olacaq. Ancaq sülhməramlılar harada yerləşəcək, onların mandatı necə olacaq, şəxsi heyəti, sayı, silahları, funksiyaları nə olacaq, onların təhlükəsizliyini kim təmin edəcək? Buna görə də bütün bu məsələlərin çox diqqətlə öyrənilməsi tələb olunur və yalnız bundan sonra deyə bilərik ki, bəli, biz buna razıyıq və ya razı deyilik. Ona görə bu sual hələ tezdir”.
Politoloq bildirib ki, İlham Əliyevin bu müsahibəsindən 10 gün keçdikdən və Azərbaycan Ordusunun strateji şəhər olan Şuşanı işğaldan azad etməsindən sonra rəsmi Bakı rusiyalı sülhməramlıların bölgədə yerləşməsinə razılaşdı. Bundan əvvəl isə Rusiya Prezidenti Vladimir Putinlə Türkiyə Prezidenti Rəcəb Tayyib Ərdoğan arasında telefon danışığı olmuşdu:
"Böyük ehtimalla Türkiyə Prezidenti da tərəflər arasında bəyanatın mətni ilə əvvəlcədən tanış idi. Təsadüfi deyil ki, Ankara Bakı ilə paralel şəkildə imzalanan bəyanatı müsbət qiymətləndirdi. Buna baxmayaraq, Rəcəb Tayyib Ərdoğan Vladimir Putinlə telefon danışığında Rusiya kimi türkiyəli hərbçilərin də bölgədə sülhməramlılar qismində iştirakının vacib olduğunu Kreml sahibinin diqqətinə çatdırdı. Putinin cavabı belə oldu ki, ermənilər tarixdən çıxış edərək türkiyəli hərbçilərin Dağlıq Qarabağın daxilində yerləşməsindən qorxurlar. Putinin sözlərinə görə, Ərdoğan vəziyyəti anlayıb və israr etməyib. Ancaq Putin daha sonra verdiyi müsahibədə sözlərinə onu da əlavə etdi ki, Türkiyə ilə Azərbaycan strateji müttəfiqdirlər, bu, onların hüququdur və Türkiyə hərbçilərinin Azərbaycanda varlığına mane ola bilməzlər. Başqa sözlə, Türkiyə hərbçilərinin Şuşada, Laçında və ya Kəlbəcərdə yerləşməsinə heç kim və heç nə mane ola bilməz. Bu istiqamətdə çalışmalar sürətlənib. Türkiyənin müdafiə naziri Hulusi Hakar da hər dəfə vurğulayır ki, Rusiya hansı hüquqla hərbçilərini Azərbaycan ərazisində yerləşdiribsə, Türkiyə hərbçiləri də eyni hüquqla Azərbaycanın tərkib hissəsi olan Dağlıq Qarabağda və ətrafında mövcud olacaqlar, sayları da rusiyalı hərbçilərin sayından az olmayacaq”.
Türkiyə hərbçilərinin Azərbaycanın Qarabağ bölgəsində rusiyalı hərbçilərlə birgə patrul xidmətində iştirakının təmin olunacağını vurğulayan ekspert Türkiyə və Rusiya prezidentlərinin bu mövzunu noyabrın 24-də telefon danışığında yenidən müzakirə etdiklərini bildirib:
"Türkiyə Cümhurbaşqanının sözçüsü İbrahim Qalın Tvitter hesabında son yazdığı "Türkiyə Qafqazın ən yeni tarixində aktiv rol oynamağa davam edəcək” cümləsi də bundan xəbər verir. Yaxın gələcəkdə Naxçıvan istiqamətində nəqliyyat və dəmiryolunun açılması Azərbaycanla Türkiyəni birləşdirməklə yanaşı, Türkiyə ilə Rusiya arasında da quru və dəmir yolu ilə ticarət mübadiləsinin artmasına şərait yaradacaq. Ermənistan Azərbaycan torpaqlarına iddiasından və bir sıra Qərb ölkələrində keçmiş Dağlıq Qarabağın "müstəqilliyini” tanıtmaq kimi təxribatlarından əl çəkərsə, bu ölkənin də gələcəkdə regional layihələrdən faydalanması mümkündür. Ancaq bunun üçün ermənilər yüzillərdir türk əleyhdarlığı üzərindəki düşüncə tərzinə son qoymalıdırlar. Ermənistan bu ağır xəstəlikdən qurtulmayınca əvvəlki kimi regional layihələrdən kənar qalacaq”.
