Münaqişə ölkə liderlərinin şəxsi intusiyasını, informasiya qıtlığında və təhlil üçün vaxt olmadığı şəraitdə qərar qəbul etmək qabiliyyətini göstərir. Buna görə də belə hallarda tərəfdaş etibarı məsələsi ön plana çıxır. Etibar formal öhdəliklərə nisbətən daha vacib faktora çevrilir.
Bu barədə Rusiya Şurasının beynəlxalq münasibətlər üzrə baş direktoru Andrey Kortunov "Dialogorg.ru”ya müsahibəsində danışıb.
"Vladimir Putin kimə daha çox etibar edir: Nikol Paşinyana, yoxsa İlham Əliyevə” deyə soruşsanız, deyə bilərəm ki, məncə, Əliyev Putinə daha yaxındır. O, sovet nomenklaturasının ailəsində anadan olub, MDBMİ-nin məzunu, keçmiş partiya üzvüdür və s. Putin Əliyevi iyirmi ildir tanıyır və yəqin ki, onu Paşinyandan daha yaxşı başa düşür.
Paşinyan tamam başqa bir mühitdən gəlib, rus dilində sərbəst danışmır, onun tamam başqa üslubu var. Onlar Putinlə çox fərqlidirlər, aralarında hətta yaş fərqi də çoxdur. Paşinyan siyasətçi kimi təcrübəsiz, həm də emosional olduğundan, ona müvafiq dosye hazırlayacaq insanlar hər zaman tapıla bilər. "Baxın o nə deyib”, "kiminlə görüşüb”, "kimi dəstəkləyib” kimi məlumatları Putinə təqdim edə bilərlər. Bu halda, əlbəttə, etibarlı münasibət qurmaq asan deyil”, - o bildirib.
