BMTnin Qarabağla bağlı vacib bəyanatına TŞnin üzvündən mane
06.11.2020
BMT Təhlükəsizlik Şurasında Qarabağla bağlı vacib bəyanatlardan birinin qəbul olunmasına TŞ-nin daimi üzvlərindən biri mane olub.
Bunu jurnalistlərə Ermənistan Xarici İşlər nazirinin müavini Şavarş Köçəryan deyib.
"BMT TŞ-nin Qarabağla bağlı qapalı iclası başlayanda BMT TŞ-nin daimi üzvü olan həmsədr ölkələr – Rusiya, ABŞ və Fransa balanslı mətn təqdim etdi. Bu mətn Rusiya tərəfindən səsləndirilməli idi. Söhbət təkcə atəşkəsdən yox, həm də üçüncü tərəflərin müdaxiləsinin dayandırılması və terrorçuların konflikt zonasına cəlb edilməməsindən gedirdi. Lakin BMT TŞ-nin daimi üzvü olan ölkələrdən biri bu təşəbbüsü məhv etdi. Nəticədə Rusiya nümayəndəsi aydın olmayan bir mətn səsləndirə bildi”, – deyə o bildirib.
Bununla belə Köçəryan TŞ-də ümumi bəyanatın əleyhinə hansı ölkənin səs verdiyini açıqlamayıb.
Qeyd edək ki, BMT TŞ-nin daimi üzvləri – ABŞ, Fransa, Rusiya, Britaniya və Çindir.
Bundan öncə Təhlükəsizlik Şurasının Fransa və Rusiya tərəfindən hazırlanan yekun bəyanatında Qarabağda işğal edilmiş ərazilərin azad edilməsinə dair qətnamələrə istinad edilmədiyi üçün BMT TŞ-nin qeyri-daimi üzvü olan bir sıra ölkələr buna etiraz etmiş və bəyanata bu qətnamələrin salınmasını israrla tələb etmişdilər. Bundan sonra ümumiyyətlə hər hansı bəyanat qəbul edilməmişdi.
