Çin Böyük Britaniyaya etiraz edib
15.07.2020
Rəsmi Pekin Böyük Britaniyanın Çinin qabaqcıl telekommunikasiya şirkəti olan "Huawei"yə tətbiq etdiyi qadağaya sərt etiraz edib.
AZƏRTAC xəbər verir ki, Çin Xarici İşlər Nazirliyinin rəsmisi xanım Hua Çunyin iyulun 15-də keçirdiyi mətbuat konfransında Böyük Britaniyanın bu qərarı ticari və texnoloji məsələləri son dərəcə siyasiləşdirərək qəbul etdiyini, bu ölkədəki Çin investisiyalarının təhlükəsizliyini açıq şəkildə təhdid etdiyini bildirib. O, ölkəsinin baş verənləri tam və ciddi şəkildə qiymətləndirməyə davam edəcəyini deyib.
Qeyd edək ki, iyulun 14-də Böyük Britaniya hökuməti Çinin "Huawei" şirkətinin ölkənin 5-ci nəsil mobil rabitə şəbəkəsinin (5G) qurulmasında iştirakına qadağa tətbiq etməyə başlayıb. Belə ki, London ölkənin mobil rabitə operatorlarının "Huawei" şirkətindən 5G avadanlığı almasını qadağan edib. Bundan başqa, mobil operatorlara 5G şəbəkəsində istifadə etdikləri "Huawei" avadanlıqlarını 2027-ci ilədək istismardan çıxarmaq əmr edilib.
Böyük Britaniyanın rəqəmsal media və mədəniyyət üzrə Dövlət katibi Oliver Dovdın bu qərarın ölkədə 5G şəbəkəsinin istismara verilməsini 3 ilədək gecikdirə biləcəyini etiraf edib. Bundan əvvəl, ABŞ Çin şirkətinə qadağa tətbiq etməyə başlayıb.
