Su problemi bu gün həll ediləcək - AÇIQLAMA
04.07.2020
Füzuli, İmişli, Ağcəbədi rayonlarında su problemlərinin səbəbləri açıqlanıb və qısa zamanda həll edilməsi gözlənilir.
Bu barədə Azərbaycan Meliorasiya və Su Təsərrüfatı ASC-dən bildirilib.
"Füzuli rayonun Alxanlı kənd sakini Kamal Quliyevin, transformator yarımstansiyasının olmaması səbəbindən kənd ərazısində mövcud olan, istismarı dayandırlmış subartezian quyusuna yeni transformatorun quraşdırılması və eneri şəbəkəsinə qoşulması barədə müraciəti araşdırılıb və əvvəllər mövcud olmuş trasformator yarımsiansiyasının "Azərişıq” ASC-nin yerli qurumunun balansında olduğu müəyyən edilib.
Azərişıq ASC ilə aparılmış danışıqların nəticəsi olaraq, həmin quyu üçün transformator yarımstansiyası ayrılıb və hazırda quraşdırma işləri aparılır. Quyunun günün sonunadək işə salınması nəzərdə tutulub. Məlumat üçün bildiririk ki, həmin quyunun ətrafında olan sahələr əvvəllər Köndələn çayından su götürən sularla suvarılıb. Hazırda çayda su olmadığından quyunun bərpasına zərurət yaranıb”, - məlumatda deyilir.
Qeyd edilib ki, İmişli rayonunun Xoşçobanlı kəndində 820 ha torpaq sahəsi başlanğıcını Cənubi Muğan kanalından götürən Qızılarx kanalı vasitəsi ilə suvarma suyu ilə təmin edilir: "Həmin kanal rayonun 24 kəndinin 10 800 ha sahəsinə xidmət edir. Hazırda kanala saniyədə 5 kubmetr su verilir və həmin su limit əsasında proporsional olaraq kəndlər arasında bölünür. Xoşçobanlı kəndinə limitə uyğun su verilir və su təminatında çətinlik yoxdur”.
Vurğulanır ki, Ağcabədi rayonun Afşar və Qaradolaq kəndlərinin sakinləri tərəfindən daxil olan müraciətlər araşdırılıb: "Bu kəndlərin əkin sahələrinin su təminatı əsasən başlanğıcını Araz çayından götürən Yeni Xanqızı kanalı vasitəsilə həyata keçirilir. Bu kanal vasitəsi ilə rayonun 8 kəndinin 14 000 ha-ya yaxın, o cümlədən Afşar kəndinin 2 100 ha və Qaradolaq kəndinin 2 283 ha sahəsi su ilə təmin edilir. Hazırda kanal vasitəsi ilə rayona saniyədə 2 kubmetr su verilir və su bölgüsü qrafiki əsasında kəndlər arasında paylanılır. Suyun miqdarı az olduğundan suvarmada gecikmələr yaranır.
Su təminatına kömək göstərilməsi məqsədi ilə Cəmiyyətin nümayəndəsi rayona ezam edilib. Hazırda Araz çayında su sərfi müəyyən qədər artdığından Yeni Xanqızı kanalı vasitəsi ilə Ağcabədi rayonuna verilən suyun miqdarının saniyədə 3 kubmetrə çatdırılması üçün tədbirlər görülür. Günün sonuna suyun verilməsi təmin ediləcək.
Goranboy rayonun Kələk kənd sakinləri Nəbi İbrahimov, Yaqub Əliyev və Qaramusanlı kənd sakini Şəmsəddin Mirzəyevin müraciətləri barədə bildiririk ki, rayonun Kələk kəndi ərazisində Cəmiyyətin yerli istismar idarəsinin balansında 13 ədəd subartezian quyusu var və bu quyular hazırda işlək vəziyyətdədir. Lakin quyulardan 2 ədədi uzun müddət istismarda olduğundan məhsuldarlığı xeyli azalıb və təlabatı tam ödəmir.
Rayonun Qaramusalı kəndində istismarda olan 25 ədəd quyu işlək vəziyyətdədir. Onlardan 3 ədədinin məhsuldarlığı azalmışdır. Sakinlər həmin quyuların ətrafında yeni quyu lüləsinin (kolunun) qazılmasını xahiş edirlər. Məlumat üçün bildiririk ki, cari ildən rayon ərazisində məhsuldarlığı azalmış quyulardan 10 ədədinin, o cümlədən Kələk kəndində 1 ədəd və Qaramusalı kəndində 1 ədədinin yanında yeni quyu lüləsinin (kolunun) qazılması nəzərdə tutulub, bu quyulardan ikisində qazma işləri başa çatdırılıb və ilin sonunadək digər quyularının qazılması təmin ediləcək”.
