"SƏLİS"-in təqdimatı keçirilib - FOTOLAR
30.10.2019
Bakıda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yeni brendi olan SƏLİS - Sürətli Əlaqələndirmə və Layihələrin İdarəetmə Sisteminin təqdimatı keçirilib.
AZƏRTAC xəbər verir ki, tədbirdə çıxış edən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev SƏLİS barədə ətraflı məlumat verib. Bildirib ki, bu sistem vətəndaş cəmiyyətinin inkişafında yeni keyfiyyət mərhələsinin əsasını qoyan innovativ tətbiqdir. Onu yaratmaqda məqsəd qeyri-hökumət təşkilatlarına dövlət dəstəyini müasir dövrün tələblərinə uyğun şəkildə təşkil etmək, QHT-dövlət münasibətlərində yeni əməkdaşlıq modelini formalaşdırmaq, Şuranın fəaliyyətində şəffaflığı, hesabatlılığı və səmərəliliyi daha da artırmaq, ictimai nəzarəti və qərar qəbulu prosesində vətəndaşların iştirakını təmin etməkdən ibarətdir. Şura Prezident İlham Əliyevin elektron hökumətin inkişafı və rəqəmsal hökumətə keçidlə bağlı, həmçinin dövlət qurumlarının göstərdiyi elektron xidmətlərin təkmilləşdirilməsi ilə əlaqədar imzaladığı fərman və sərəncamları rəhbər tutaraq, göstərilən xidmətləri tam elektronlaşdırmaq və keyfiyyətini yaxşılaşdırmaq məqsədilə 2019-cu ildə 20 yeni elektron xidmət istifadəyə verib. Bununla da elektron hökumətə keçid tam başa çatdırılıb. Bu xidmətlər Sürətli Əlaqələndirmə və Layihələri İdarəetmə Sistemi adı altında elektron bazada birləşdirilib.
Sonra Sürətli Əlaqələndirmə və Layihələrin İdarəetmə Sisteminin fəaliyyət istiqamətlərinə dair videoçarx nümayiş olunub.
Azərbaycan Prezidentinin ictimai-siyasi məsələlər üzrə köməkçisi Əli Həsənov bildirib ki, dövlətimizin inkişafının təməl prinsiplərini ulu öndər Heydər Əliyev müəyyən edib. 1993-2003-cü illər dövlət quruculuğu baxımından çox əhəmiyyətli dövr idi. Bu dövrdə bir sıra qlobal layihələr reallaşdırıldı, beynəlxalq əlaqələrin qurulması baxımından mühüm addımlar atıldı. 2003-2006-cı illər Prezident İlham Əliyevin rəhbərliyi ilə dövlətin modernləşdirilməsi dövrü, yeni trendlərlə zəngin tarixi dönəmdir. Həmin dövrdə vətəndaş məmnunluğu ən ümdə dövlət prioritetlərindən biri olub. 2007-2008-ci illərdə Prezident İlham Əliyevin təşəbbüsü ilə iki mühüm konsepsiya qəbul edildi. Bunlardan birincisi QHT-lərə, yəni, vətəndaş təşəbbüslərinə dəstək konsepsiyası idi. Bu konsepsiyanı reallaşdırmaq üçün QHT-lərə Dövlət Dəstəyi Şurası yaradıldı. Digər konsepsiya isə KİV-lərin inkişafına dövlət dəstəyi konsepsiyası və bununla bağlı Fondun (KİVDF) yaradılmasıdır. "Mən bu gün Şura və Fondun fəaliyyətlərini müqayisə etmək istəmirəm. Amma görünən budur ki, Şura elektron xidmətə KİVDF-dən əvvəl keçdi. Bu, yaxşı nümunədir. Düşünürəm ki, KİVDF də bundan sonra KİV-lərə göstərilən dəstəyi təmas olmadan, elektron hökumət vasitəsilə həyata keçirə, bu xidməti yarada bilər” – deyə Əli Həsənov əlavə edib.
Prezidentin köməkçisi diqqətə çatdırıb ki, vətəndaş məmnunluğunun təməlində sosial-iqtisadi və digər problemlərin həlli, firavan həyatın, təhlükəsizliyin təmin olunması, təşəbbüslərin dəstəklənməsi dayanır. Yeni yaradılan xidmətlərin, o cümlədən bu gün təqdimatı keçirilən SƏLİS-in də məqsədi vətəndaş cəmiyyəti quruculuğuna töhfə verməkdir.
Əli Həsənov qeyd edib ki, 2018-ci il prezident seçkilərindən sonra Prezident İlham Əliyev yeni islahatlar kursuna başlayıb. Bu kursun əsasını ictimai, siyasi, sosial, iqtisadi həyatımızın şəffaflaşdırılması təşkil edir. Bütün postsovet ölkələrində, o cümlədən dünya ölkələrində olduğu kimi, Azərbaycanda da hələ kölgə iqtisadiyyatı mövcuddur. Hələ də bəzi iş adamları dövlətin vergilərini tam şəkildə ödəmirlər, ayrı-ayrı sahələrdə inhisarçılıq var. Prezident İlham Əliyev iqtisadi müşavirədə bu məsələlərə toxundu. İslahatlar kursu, Azərbaycan cəmiyyətinin, iqtisadiyyatının, siyasətinin, sosial həyatının bütün sahələr üzrə şəffaflaşdırılması, kölgədən çıxarılması dövlətin iradəsidir və bu iradəyə qarşı çıxanlar cəzalandırılacaq. Prezident İlham Əliyevin həyata keçirdiyi, əsasını şəffaflaşdırma təşkil edən islahatlar kursu dövlət idarəçilik sisteminin struktur islahatlarından, idarəçilik sisteminin təkmilləşdirilməsindən başladı. Zərurəti şübhə doğuran qurumların ləğv olunması, birləşdirilməsi, orada çalışan insanların digər lazım olan sahələrə yerləşdirilməsi həyata keçirildi. Bunun ardınca iqtisadi islahatların konturları elan olundu. Dövlət büdcəsindən tutmuş xidmət sahələrinə, vergi yığımından tutmuş sahibkarlıq sahəsinə qədər həm struktur, həm dövlət idarəçilik sisteminin, o cümlədən sahibkarlıq fəaliyyətinin təkmilləşdirilməsi həyata keçirilir.
Milli Məclis sədrinin müavini Bahar Muradova SƏLİS layihəsinin şəffaflığın təmin olunması istiqamətində böyük addım olduğunu deyib. Qeyd edib ki, şəffaflığın təmin olunması ilə bağlı Azərbaycanda dövlət səviyyəsində iş aparılır. Bununla bağlı qanunlar qəbul edilib. "QHT-lərin fəaliyyətindəki bəzi çatışmazlıqların aradan qaldırılması üçün mükəmməl elektron xidmət yaradılıb. Burada elektron vətəndaş və elektron apelyasiya xidmətini xüsusi qeyd etmək lazımdır. Bu gün hər bir vətəndaşın, QHT nümayəndəsinin bütün qurumlarla əlaqələri elektron formatda şəffaf şəkildə təmin olunur. Ölkəmizdə vətəndaş cəmiyyətinin yüksək səviyyədə fəaliyyəti üçün dövlətimizin başçısı güclü siyasi iradə nümayiş etdirir. SƏLİS layihəsi vasitəsilə bütün donor təşkilatların cəlb edilərək ideyaların irəli sürülməsi, layihələrin hazırlanması, maliyyə vəsaitinin ayrılması, xərclənməsi, apelyasiyadan keçməsi məsələləri vətəndaşların diqqəti və nəzarəti altında olacaq. Vətəndaş cəmiyyəti qurumları, problemlərin həllini üzərinə götürən insanlar məsuliyyəti özləri daşıyacaqlar,” – deyə Bahar Muradova vurğulayıb.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev deyib ki, SƏLİS həm dövlətin, həm də vətəndaşların mənafeyinə cavab verir. Bu sistem vasitəsilə vətəndaşlar Şuranın xidmətlərindən fasiləsiz istifadə edə biləcəklər. Ülvi Mehdiyev bildirib ki, SƏLİS əlçatanlığı və şəffaflığı təmin edir. Sistem müasir idarəetməyə tam uyğundur.
BMT-nin Azərbaycan üzrə rezident əlaqələndiricisi Qulam İshaqzai Sürətli Əlaqələndirmə və Layihələrin İdarəetmə Sistemini vətəndaş cəmiyyətinin fəaliyyətində şəffaflığın təmin olunması baxımından əhəmiyyətli addım kimi dəyərləndirib. Bu istiqamətdə göstərilən bütün səylərin BMT tərəfindən yüksək qiymətləndirildiyini bildirən Qulam İshaqzai deyib: "SƏLİS və bu tipli digər layihələrə dəstək verməyə hazırıq. Ümid edirik ki, bu sistem özünü doğruldacaq”.
Sonda Sürətli Əlaqələndirmə və Layihələrin İdarəetmə Sisteminin yaradılmasında iştirak edən şəxslərə Fəxri diplomlar təqdim olunub.
